|
Pubblicata in data : 27/5/2007
Siamo nel periodo elettorale. Alle elezioni Comunali del 27 aprile 1997 si presentano tre liste: la stella, la barca, il ramo d’ulivo. Grande battaglia elettorale.
Stu pajìsi e Badulatu
on si pota cchjù sarvàra
cu a farcigghja, o cu l’aràtu
u finìru e sdarrupara.
Ma si sapa, cu cumanda
on’è certu pe’ ideala,
tutti chihri de la banda
vann’u s’inchjanu i gangala.
Comu cana s’avventàru
a mangiara a cchjù non “possu”
paru paru su spruppàru
tuttu quantu finu all’ossu.
Si quarcunu, pe’ pagura
tinna l’ossu cunservatu,
s’appojàu ahra mangiatùra
e non bbozza disturbatu.
N’attra vota, pe’ ventura
ormai tuttu cunsumatu,
vena misu ahra pastura
pe cu’ ancora on’è saziàtu.
Cu tri mbremi si partiru
u s’affèrranu chihr’ossu
da Marina si jungiru
cu chihr’attri de lu Fossu.
Cu ‘na frasca d’allivara,
cu ‘na stihra strallucenti,
cu ‘na barca ammenzu mara
vonn’u mbrògghianu la genti.
Ma lu popalu scorciatu
non si dassa cchiù ngannara
chihru jornu destinatu
vota sulu pe’ votara.
Autore
Tota Gallelli
|
